Urim per 5-vjetorin e revistes Pelegrin

REPUBLIKA E SHQIPËRISË

MINISTRIA E PUNËVE TË JASHTME

INSTITUTI KOMBËTAR I DIASPORËS

Tiranë, më 18. 09. 2009

Lënda: Urime “ 5-vjet Pelegrin”

Ambasadorit të Republikës së Shqipërisë në Republikën Greke

z. Vili Minarolli

I dashur Ambasador,

Në pamundësi të marrim pjesë në festimet e bukura që ambasada do të organizojë me rastin e 5-vjetorit të revistës letrare kulturore të Klubit të Shkrimtarëve Shqiptarë në Botë “Drita”, ju lutemi përcillni pjesëmarrësve si dhe themeluesit dhe drejtorit të saj z. Nase Jani, të gjitha urimet tona!

Ky 5-vjetor është një ngjarje e madhe dhe do të mbesë e paharrueshme. Puna e themelimit dhe e mbajtjes aktive të kësaj reviste të bukur dhe cilësore, bashkuese dhe frymëzuese e talenteve dhe vlerave të vërteta letrare, veçanërisht të diasporës sonë, meriton nderimin e kujtdo në vendin amë.

Përgëzimet më të sinqerta fituesve të çmimeve që do të jepen, suksese të gjithë krijuesve që bashkëpunojnë me “Pelegrin”.

Pelegrinit edhe pesëqind vite të tjerë, jetë e kontribut për kombin!

Ju falënderojmë edhe Juve si edhe stafin tuaj bashkëpunues për gjithçka që bëni në mbajtjen gjallë të këtij shpirti artistik!

Edhe një here tjetër, suksese të pafund Nase Janit, bashkëpunëtorëve dhe kolegëve të tij në Greqi e kudo nëpër glob! Athina ka qenë historikisht themeluesja e Olimpiadës dhe e pishtarit të saj historik. “Pelegrin” është një pishtar i tillë, që rend nëpër botë.

DREJTORI

Flamur Gashi

U festua "Pesë vjet Pelegrin" !

U festua “Pesë vjet “Pelegrin”

Klubi i Shkrimtarëve Shqiptarë në Botë “Drita” në bashkëpunim me Ambasadën Shqiptare në Athinë, organizuan mbrëmjen jubilare “5-vjet Pelegrin”. Në këtë veprimtari morën pjesë shkrimtarë, artistë e intelektualë shqiptarë me banim në Athinë, shkrimtarë, gazetarë e personalitete të kulturës greke, përfaqësues të medias shqiptare që veprojnë në Greqi, miq dhe bashkëpunëtorë të revistës “Pelegrin”.

Që nga hyrja e Ambasadës e deri tek salla e veprimtarisë , gjithë mjedisi ishte zbukuruar me afishe “Pesë vjet Pelegrin”, “Çmimi Ali Asllani “Liriku më i mirë i vitit”, portreti poetik i Luan Xhulit, fituesit të këtij çmimi... Ishte ngritur këndi i librit, ku Bora Xhuli, me një shportë në dorë u shpërndante të ardhurve stilolapsat të shkruar “5 vjet Pelegrin & Ambasada Shqiptare në Athinë”, medaljonet e kësaj veprimtarie si dhe Fletëpalosjet “Pesë vjet Pelegrin” dhe “Poeti Luan Xhuli”.

Në krye të sallës , mes flamurëve kombëtarë të Shqipërisë dhe Greqisë qëndronte Flamuri i Klubit “Drita”, i skicuar dhe i realizuar nga Robert Goro e Jorgo Seferi, si dhe tavolina me 13 numërat e revistës Pelegrin, të botuar në pesë vite, libri fitues i Çmimit “Ali Asllani” “Ditën ëndërroj, natën e lë zgjuar” i poetit Luan Xhuli. E veçanta e kësaj veprimtarie ishin edhe stendat me librat e rrallë, të qëmtuar nëpër vite nga koleksionisti pasionant, me rrënjë nga Lunxhëria Dr. Panajotis Kolomihalis.

“Kam një lutje Pelegrin

Kam një fjalë amanet:

Kur t’i sillesh rrotull globit,

Puthmi-puthmi ca poetë!”

Me këta vargje të poetes Ilirjana Sulkuqi, të ardhur nga Nju Jorku dhe të recituar me pasion nga aktorja vlonjate, anëtarja e Klubit të Shkrimtarëve “Drita”, Gjinovefa Redhi, u çel veprimtaria letrare.

Kryetari i Klubit Drita, shkrimtari Nase Jani, foli për rrugën pesëvjeçare të Revistës Pelegrin, duke falënderuar nismëtarët, shkrimtarët e bashkëpunëtorët e shumtë të kësaj reviste të përbashkët.

Bashkudhëtarë me Pelegrinin janë shumë-tha Drejtori i Pelegrinit dhe midis 127 bashkëpunëtorëve në këta pesë vjet falënderoi:

Dr. Evriviadhi Goro, Telemak Koça, Myslim Maska, Dionis Qirzidhi, Fatime Kulli, Eglantina Kume, Rozi Darling Vlora, Dr. Engjëll, Telegrafi, Mensur Spahiu, Rudina Xhunga, Adnan Mehmeti, Rozi Theohari, Aleko Likaj, Ilia Vasili, Dhori Thanasi, Lulëzim Lekdushi, Anton Gojçaj, Suzana Kuqi, Zois Shutie, Odhise Goro, Nehas Sopaj, Dashamir Malo, Dalip Greca, Arben Kondi, Albana Temali, Lefter Vogli, Mimoza Hametaj, Marjana Prifti, Robert Martiko, Vera Hanxhaku, Lucie Neçaj, Luan Xhuli, Leon Lekaj, Punëtore Zibaj, Valbona Zunçe, Myrteza Mara, Festim Liti, Gëzim Llojdia, Ardita Repishti, Vaid Hyzoti, Ardita Jatru, Ndue Lazri, Algert Siqeca, Fatjon Pajo, Merita Bajraktari, Aida Dismondy, Alush Kurti, Vlash Fili, Eduart Ymeri, Anna Petrela, Valentina Zhupa, Armela Hysi, Milla Bala, Grigor Jovani, Ndue Hila e Rizah Sheqiri, Julia Gjika, Mikel Nakuçi, Niko Ago e deri tek “Stafi” me kryeredaktoren Iliriana Sulkuqi, Kolec Traboini, Vasil Qesari, Farruk Myrtaj e Fatmir Terziu. Shumë emra të përveçëm të letrave shqipe kanë qenë te “Pelegrin”: Dritëro Agolli e Ismail Kadare, Pëllumb Kulla e Betim Muço, Perikli Jorgoni e Robert Zhvarc, Mojkom Zeqo e Faslli Haliti , Skënder Temali e Skënder Drini, Aurel Plasari e Hyskë Borobojka.

Miq të Pelegrinit kanë qenë dhe shkrimtarët grekë si: Nasos Vajenas, Tito Patriqio, Sotiris Dhimitriu, Jorgos Hronas, Kostas Riconis, Kristos Tumanidhis, Dino Kubati, shkrimtaria nga Franca: Claude Chatron-Colliet, etj.

Veprimtaria e Pelegrin-it nuk mund të ndahet nga gazeta “Tribuna” dhe drejtori i saj, shkrimtari e publicisti Robert Goro. Së bashku i kemi “qarë hallet”, me mendimin tek e nesërmja-përfundoi ai dhe shpërndau disa Diploma Mirënjohje për bashkëpunëtorët.

Pastaj u lexuan disa nga përshëndetjet e veçanta që i kanë ardhur Revistës Pelegrin si nga shkrimtari i madh Dritëro Agolli, albanologu i shquar me qëndrim në Holandë, Robert Elsie, ish presidenti i Shqipërisë Dr. Alfred Miosiu, shkrimtarja franceze, Claude Chatron-Colliet, Dr. Evriviadhi Goro, Dr. Adem Harxhi e Dr. Mikel Nakuçi, shkrimtarët Betim Muço, Pëllumb Kulla, Julia e Thanas Gjika, Dalan Luzaj, Adnand Mehmeti, Ndue Hila, Monda Moisiu, Fation Pajo, Vlash Fili, Llazar Vero, Flonia Engjëll Telegrafiu nga SHBA; kryesia e Akademisë Shqiptare-Amerikane dhe Kryesia e Shoqatës “Bijtë e Shqipes në SHBA; Fatmir Terziu nga Londra, Albana Temali, Darling Ismail Vlora, Mimoza Hametaj, Alush Kurti, Ndue e Zhaneta Lazri, nga Italia, shkrimtarët Pandeli Koçi, Astrit Bishqemi, Fatime Kulli, Myrteza Mara, Milianov Kallupi, Ardita Repishti, Namik Selmani, Arben Lagreta, Agim Blloshmi nga Shqipëria; Aishe Qorraj Berisha (Shqipja e Dukagjinit), Xheladin Mjeku nga Kosova; Vasil Qesari, Aleko Likaj, Viktor Bruçeti, Gafur Kabashi nga Franca, Robert Goro, Luan Xhuli, Myslim Maska, Odhise Goro, Sotir Athanasiu, Robert Martiko, Kristos Tumanidhis, etj. nga Greqia...

Në përshëndetjen e tij Ambasadori Vili Minarolli solli dhe përshëndetjen e kryeministrit z. Sali Berisha, kurse përshëndetjen e Drejtorit të Institutit Kombëtar të Diasporës, z. Flamur Gashi e lexoi sekretari i parë i ambasadës z. Klevis Bitro.

Plaketa-Gold e Çmimit Ali Asllani “Liriku më i mirë i vitit”, për vitin 2008, iu dha poetit Luan Xhuli, nga ambasadori V. Minarolli. U recituan poezi të autorit në shqip e në greqisht. Për krijimtarinë e Xhulit foli shkrimtari Leon Lekaj dhe përshëndetën botues e gazetarë grekë, poeti Sotiraq Mishaxhiu etj. Veprimtaria shoqërore Flutura Tafillaku, bashkë me buqetën me lule të freskëta, solli dhe urimet për Revistën Pelegrin.

Në këtë veprimtari kemi edhe një vlerësim të veçantë-tha kryetari i Klubit Drita, z. Nase Jani: Klubi i Shkrimtarëve në Botë “Drita” nderon Ambasadorin e Shqipërisë në Athinë, z. Vili Minarolli me titullin “Mirënjohja e Shkrimtarëve” me këtë motivacion:

Për bashkëpunimin e ngushtë e ndihmesën e vazhdueshme që u ka dhënë shkrimtarëve dhe gjithë përfaqësuesve të kulturës shqiptare në Greqi, duke i vlerësuar: Misionarë të ruajtjes e promovimit të idenditetit kombëtar dhe afirmimit e zhvillimit të vlerave kulturore kombëtare për bashkëpunim e integrim me kulturat europiane.

Ambasadori Minarolli, i emocionuar, falënderoi dhe e quajti këtë nder si vlerësimin më të vyer në jetën e tij, duke angazhuar kontributin e tij gjithmonë pranë krijuesve shqiptarë, në të mirë të kulturës sonë kombëtare. Ai u bë pjesë e kontributit financiar për vazhdimësinë e botimit të Revistës...

z. Nase Jani duke falënderuar gjithë ata që kanë ndihmuar në botimet e Pelegrinit: Besim Mero, Sotir Athanasiu, Athinë, Ardian Asllani (Tiranë), Flonia Engjëll Telegrafi (Nju Jork), dhe Ministrinë e Jashtme të Shqipërisë, ftoi biznesmenin Besim Mero, që mori përsipër botimin e numrit në vazhdim të Pelegrinit dhe anëtaren më të re të Klubit Drita, Borina Voko për të hapur shampanjën-simbol “Pesë vjet Pelegrin”, që vazhdoi me një koktejl për pjesëmarrësit.

Kamerat e telekronistëve dhe gazetarëve Artur Bibe, Sazan Mane, Kujtim Vani, Armand Zoga etj. Fiksuan gëzimin e përbashkët të kësaj veprimtarie mbresëlënëse.

Korrespodent i gazetës “Tribuna”

Shtator, 2009

Urime për Pelegrinin....6

“Pelegrin” ka një emër të nderuar...

Tek Revista “Pelegrin” , në mënyrën e kompozimit dhe të vlerave letrare e artistike, kujtoj revistën e atyre viteve “Nëntori”, apo Revistën “Letërsia Botërore” që botonin rusët. Rubrikat janë zgjedhur mirë dhe lexuesi i kulturuar i kërkon këto rubrika se gjen informacion dhe ushqim të zgjedhur nga letërsia shqipe dhe ajo botërore, nga talentet e reja dhe shkrimtarët e e kudondodhur jashtë Shqipërisë. Unë kam qenë bashkëpunëtor qysh në fillimet e Revistës. Gjatë këtyre 5-vjetëve “Pelegrin” ka sjellë tek ne shumë gjëra të panjohura, që nga Nobelistët, portrete të shkrimtarëve e artistëve, njerëz të shkencës e të kulturës. Tek rubrika “Nderim” ka sjellë figurat e pavdekshme të jetës kulturore e qytetare të Shqipërisë, si Violeta Manushi, Odhise Paskali, Mentor Xhemali, Robert Zhvarc, Eqrem Çabej, Ali Asllani, e shumë e shumë të tjerë. “Pelegrin”, ka përfaqësuar denjësisht, me mendimin estetik e filozofik, me krijimtarinë e botuar, jo vetëm portretin e Klubit të Shkrimtarëve në Botë “Drita”, por përfaqëson denjësisht kulturën dhe letërsinë kombëtare-shqiptare. Revistën “Pelegrin” mund ta quaj një nga veprat më dinjitoze e më me vlerë të punës së Nase Janit, në bashkëpunim edhe me stafin e miqtë e shumtë. Në këtë 5-vjetor, “Pelegrin” ka një emër të nderuar, që do e ketë edhe në shumë përvjetorë të tjerë...

Myslim MASKA

Athinë, qershor 2009

Sa herë që vijnë Ditëlindje, ndjejmë emocione dhe gëzim. Kështu ndodh me ditëlindjet e fëmijëve, kështu ndodh edhe me këtë revistë letare, që e ndjemë kaq afër shqetësimeve tona. Por ditëlindja e Pelegrinit ndryshon nga ajo e fëmijëve se kjo Revistë është rritur e burrëruar edhe në moshën 5-vjeç. Këtë e tregon: kultura, mençuria dhe dashuria që rrezaton nga njëri numër tek tjetri e nga njëra rubrikë tek tjetra... E uroj Pelegrinin që të rritet nëpër dekada duke mbetur gjithmonë i ri, i freskët e i dashur për lexuesit!

Violeta ÇELA

Athinë, maj 2009

Udhëtimi për në Pelegrin është i shenjtë.

Pelegrini të dhuron shenjtërinë e shkrimeve, rrahjet e zemrës, lotët e gëzimit dhe pikëllimit? Por dhe lotët e dashurisë për misionin e tij fisnik. Urimet dhe dëshirat për Pelegrinin janë gjithnjë në rrjedhje si përrenj mali, deri në pafundësi. Ju lumtë për gjallimin dhe jetësimin e tij. Unë ju admiroj dhe uroj për zemrën që na dhuruat.

Me respekt të veçantë Gafur KABASHI

Gap Marseje-Francë

Qershor 2009

I nderuar Z. Nase Jani!

Me rastin e pesë vjetorit të revistës tonë të dashur Pelegrin, ju uroj suksese të mëtejshme në përhapjen dhe kultivimin e kulturës sonë kombëtare. Revista juaj dhe e jona njëkohësisht, gjatë këtyre pesë vjetëve, ka qenë një tribunë zëdhënëse te artit dhe kulturës sonë kombëtare.

Pesë vjet nuk janë shumë, por as nuk janë pak, ata janë një rrugë e shtruar për të përshkuar shekuj që kjo revistë kurrë të mos plaket dhe të nënvlerësohet, por vlerat e saj shkofshin gjithmonë në rritje. Stafi juaj i nderuar ka ditur të zgjedhë ato tematika pa interes fitimi që i kanë shërbyer të gjithë shqiptarëve kudo që janë. Për këtë. Revista “Pelegrin “ kapërceu dete e oqeane dhe sot gjendet në duart e shumë shqiptarëve, si brenda kufijve dhe jashtë Shqipërisë, që nga Europa, Australia, Amerika, Kanadaja e kudo tjetër, ku flitet gjuha e bukur shqipe.

Me këtë rast, si anëtar i lidhjes së shkrimtarëve të Klubit "Drita" dua të falënderoj të gjithë ata, që u bënë pjesë e kësaj reviste të mrekullueshme, letrare –artistike, larg duarve të politikës, kësaj sëmundje të shtypit të sotëm shqiptar. Falënderoj të gjithë ata, që me shkrimet e tyre të një niveli të lartë, bënë që emri i kësaj reviste, në këta pak vite, të jetë për nga përmbajtja, në moshë madhore.

Urojmë dhe një herë zoti Nase, që forca juaj fizike, mendore dhe intelektuale të mos pushojë për të mirën e kulturës sonë kombëtare, që revista Pelegrin të vazhdojë të bashkojë krijuesit shqiptarë dhe të gjejë sa më tepër lexues, kudo në botë!

Me respekt., Ndue HILA

SHBA, maj 2009

Një organ i dashur dhe i mezipritur

Pesë vite të suksesshëm arriti revista “Pelegrin”, organi i Klubit të Shkrimtarëve “Drita”. Pelegrini është bërë organ i dashur dhe i mezipritur nga krijuesit dhe dashamirët e letërsisë së vërtetë, në çdo skaj të globit, ku rrethanat e kohës kanë shpërndarë racën e fortë e të lashtë shqiptare.

Si lexues i rregullt i “Pelegrin”, i përcjell me emocion dhe i gëzohem me shpirt rritjes impresionuese nga numri i parë në numrin e trembëdhjetë, për moshën e veçantë, pjesëmarrjen e gjerë të krijuesve e të lexuesve, cilësinë e materialeve letrare, për vendin e merituar e dinjitoz në trashëgiminë kulturore-artistike të popullit shqiptar. Në këtë përvjetor të shënuar, ndjej dhe shpreh: si rrallë organ tjetër letrar, brenda e jashtë Shqipërisë. Revista “Pelegrin” të mbush shpirtin me atdhedashuri, të dhuron kënaqësi estetike të paprovuara, të shton krenarinë e të qenit shqiptar, e më shumë të bën të ndjehesh më pranë mëmës-Shqipëri. Mesazhet e krijuesve janë shtysë drejt së mirës, të bukurës, drejt virtytit dhe afrojnë dije bashkëkohore në fushën e pamasë të letërsisë e të artit. Gëzuar, me zë të lartë, pesëvjetorin revista prestigjoze “Pelegrin”. Urime për suksese më të mëdha në realizimin e misionit kulturor-artistik dhe historik, që tashmë është më se e konfirmuar. Urime-zemre përcjell dhe për poetin, shkrimtarin, publicistin dhe botuesin Nase Jani, falë punës së tij, deri në kufijtë e së pamundurës, vazhdon të ketë jetë revista “Pelegrin”!

Alush KURTI

Ravenna Itali, Maj, 2009

Para pesë vjetësh

Shfletoj numrin e ri të revistës sonë, “Pelegrin” dhe mendimi më shkon tek fillimet e saj, para pesë vjetësh. Miku im, Nase Jani, ky poet, prozator dhe publicist i njohur, atë ditë erdhi te Qendra Kulturore e Shqiptarëve në Pire me një “sihariq” të veçantë, që ishte më tepër dëshirë dhe ide, akoma e pa realizuar. Na foli për një revistë, që do të mund të realizohej e të botohej, falë mirësisë së lindur dhe vullnetit të organizuar të talenteve. Në projektin e Nases nuk mungonin shkrimtarët në emigracion, penat e dëgjuara të letrave shqipe, korifenjtë e letërsisë botërore dhe as talentet e reja. Ai gjeti mbështetjen tonë dhe revista u mundësua të bëhej realitet. Pelegrini duhej të lindte. Pelegrini lindi dhe u bë pesë vjeç. Ky djalë i mbarë kërkohet në të pesë kontinentet. Ai ka moshën e mençurisë dhe të dashurisë së njerëzve të dijes. U rrittë sa të ketë jetë, Pelegrini ynë!

Sotir ATHANASIU

Athinë, maj, 2009

Si një çerdhe që mbledh zogjtë

Kështu e mendoj revistën “Pelegrin” , si një çerdhe që mbledh zogjtë, pelegrinë-shtegtarë. Kjo fjalë-simbol, më sjell ndër mend vitet e fantazisë së fëmijërisë, në brigjet e kaltër të Jonit... Gjatë ditëve të vjeshtës, s’ia ndaja sytë qiellit. Merrja pas zogjtë fluturues, që shtegtonin larg, shumë larg... në kërkim të vendeve të ngrohta që të ndërtonin çerdhet e jetës. Mezi e prisja pranverën...

Me zogjtë shtegtarë, miq të fëmijërisë sime, dua t’i krahasoj krijuesit emigrantë, që kanë bashkuar frymëzimin e tyre tek çerdhja e revistës “Pelegrin” .

U bënë pesë vjet, që kjo misionare e dijës dhe e përparimit, mbledh në gjirin e saj shumë e shumë krijues, të shpërndarë nëpër botë, duke krijuar “botën” e saj të mençurisë e të bukurisë shpirtërore. E uroj revistën tonë “Pelegrin” për misionin e saj fisnik, që po kryen!

Odhise I. GORO

Kalithea, maj, 2009

Pelegrinë në të pestë kontinentet...

Në këtë jetë që të gjithë jemi pelegrinë në lëvizje, madje edhe kur ecim brenda vetes sonë, për tê ndriçuar qoftë edhe ndonjë cep të errët të shpirtit të drobitur nga streset e kohës. Do të uroja me gjithë zemër, stafin tuaj të mrekullueshëm i cili ka marrë përsipër këtë mision sa të hijshëm, aq edhe fisnik duke grumbulluar dhe botuar autorë shqiptarë që gjithsesi janë vërtetê pelegrinë në të gjithë vendet ku ndodhen, në të pestë kontinentet.Ndjehem i lumtur njëkohësisht që po më jepet mundësia të uroj njerëzit e mirê që mendojnë për pavdekësinë e kulturës dhe gjuhën e bukur shqipe.

Pune të mbarë vëllezër. Jetë të gjatê "Pelegrinit"

Agim BLLOSHMI

Gazetar – Shqipëri

Qershor, 2009

Të nderuar kolegë

Me rastin e 5-vjetorit të themelimit të revistës suaj letrare "Pelegrin" ju uroj suksese të mëtejshme profesionale në krijimet tuaja të ardhëshme në faqet e saj!

Me konsideratë, Arben LAGRETA

Kryetar i Unionit te Gazetarëve Shqiptarë

Dega Rajonale e Prefekturës së Shkodrës

Shkodër, prill 2009

VLERA QË KORRESPONDOJNË ME KOHËN

Për Klubin “Drita” dhe Revistën “Pelegrin”, nuk mund të përmbyllësh mendimin as edhe me një bjeshkë fjalësh e përgëzimesh. Sikur fitohet përshtypja se ke të bësh me një organizim shumëvjeçar, e jo me kaq pak vite, por që rrezatojnë një horizont kaq të gjerë, duke na sjellë gjithë botën shqiptare në një vend, në një web-faqe dhe në një brendësi kopertinash, ku bota letrare, shpirtërore dhe intelektuale frymojnë shqip. Edhe në ndonjë shkrim tjetër, por edhe me rastin e pesëvjetorit tuaj, si dhe me rastin e konstituimit të kryesisë së re, ndaj të njëjtin mendim, të njëjtat dëshira dhe përgëzime. Nuk ka çka i shtohet fjalë tjetër miradie këtyre vlerave dhe rezultateve të stafit, bashkëpunëtorëve dhe anëtarësisë së gjerë, kontributet e të cilëve korrespondojnë ngushtë me zhvillimet mbarëshqiptare kudo në botë, duke afirmuar vlerat kombëtare dhe kulturore me përkushtim. Me dëshirat më të mira që puna dhe rezultatet tuaja të jenë shekullore uroj që përvjetorët tjerë t’i kurorëzoni edhe me shumë suksese tjera, me rritje të numrit të anëtarësisë, me botime dhe shtrirje të aktiviteteve në gjithë planetin, që në fakt është edhe synimi i këtij klubi, meqë bashkon krijuesit letrar të kudondodhur nëpër botë.

Xheladin MJEKU