Klubi Drita, 10 vjet - Në Sarandë tek “Bolero” e Miradije Ramiqit

Klubi Drita, 10 vjet

Në Sarandë tek “Bolero” e Miradije Ramiqit

Mëngjesi i 2 shtatorit na gjeti në qytetin e Sarandës. Aty na priste ekspozita në pikturë: “Bolero” e piktores-poete Miradije Ramiqi. Poeti Dashamir Malo, si gjithmonë mikpritës. Udha nga Vlora në Sarandë nuk na u duk fare, kur gjendeshim me Gramozin, një biznesmen pasionant i letërsisë dhe me poetin Myrteza Mara. Llogoraja, Himara, Borshi, gjithë bregdeti ishte një Poet Gjigand.

Në mjediset e Muzeut Etnografik të Sarandës, 40 punime në vaj të piktores Ramiqi. Poezia dhe piktura e saj plotësojnë portretin e kësaj intelektualeje, pedagoge në Univeristetin e Arteve të Prishtinës.

Kur i dhamë Kartën e Anëtarësimit Miradija u shpreh e emocionuar: “Ndjehem e nderuar, që më pranuat te Klubi i Shkrimtarëve Shqiptarë në Botë “Drita”, që ka edhe revistën e mirënjohur “Pelegrin” ...”.

.

Klubi “Drita” 10 vjet - Veprimtari

Klubi “Drita” 10 vjet

Veprimtari të Klubit “Drita” në Shqipëri

Gjatë muajit shtator 2010, Klubi i Shkrimtarëve Shqiptarë në Botë “Drita” organizoi disa veprimtari në qytetin e Vlorës, Beratit, Sarandës...

Biblioteka “Drita” tek Shtëpia e Librit “Adion”, Vlorë

Klubi i Shkrimtarëve Shqiptarë në Botë “Drita” (dekoruar nga Presidenti i Shqipërisë me “Medaljen e Mirënjohjes”) Në bashkëpunim me Klubin e Shkrimtarëve “Petro Marko”, Vlorë, organizuan çeljen e Bibliotekës “Drita” te Shtëpia e Librit “Adion” në qytetin e Vlorës. Përgjegjësja e kësaj Biblioteke, Dr. Edlira Çerkezi deh personeli i këtij institucioni, organizuan më së miri, zhvillimin e kësaj veprimtarie. Shtatëdhjetë libra, nga shkrimtarë të Klubit, në gjinitë roman, tregime, poezi, monografi, etj. si dhe numrat e Revistës “Pelegrin”, deri në Pelegrin 15, i porsadalë nga shtypi, u bënë pronë e lexuesve të këtij institucioni kulturor.

Ndahen Çmimet e Konkursit “Pranvera Letrare”

Në kuadrin e 10-vjetorit të themelimit të Klubit “Drita”, u ndanë Çmimet e Fituesve të Konkursit “Pranvera letrare”, organizuar nga Klubi “Drita” dhe Gazeta “Tribuna”, Athinë. Fituesit: Në Poezi: Ivana Dervishi, e ardhur nga Durrësi (me Çmim të Parë), Borina Voko-Athinë, (Çmim të Dytë), Brisa Palikuqi –SHBA (Çmim të dytë), Marsela Hajdini-Lushnjë (Çmim të Tretë), Diziana Ballolli-Kretë, Greqi (Çmim të tretë). Brikena Boraku nga Vlora u nderua me Çmim të Parë në Skicë Letrare.

Nxënësja e talentuar, Ivana Dervishi, u zgjodh Kryetare e Talenteve të Reja të Klubit Drita, “Pranvera Letrare”.

Fituesve iu dhanë Diploma, Karta e Anëtarësimit të Klubit “Drita” në grupin “Pranvera Letrare” dhe Revista “Pelegrin”-15, ku ishin përfaqësuar edhe me krijimtarinë e tyre.

Në këtë veprimtari, shkrimtari Nase Jani u nderua me titullin “Nderi i Klubit të Shkrimtarëve Petro Marko.

Klubi “Drita” me 165 Anëtarë

Në veprimtaritë e Organizuara u bënë edhe pranime të reja dhe u ndanë Kartat e Anëtarsimit të Klubit “Drita”: Miradie Ramiqi-Prishtinë, Luan Toto-Vlorë, Vilhelme Vranari (Haxhiraj)-Vlorë, Pëllumb Velo-Vlorë, Edlira Çerkezi-Vlorë, Petraq Kote, i ardhur nga Fieri, Silvana Qose (Kuçovë-Itali), Maurizio Silvestelli (Ankona-Itali), Demir Gjergji-Tiranë, Kozeta Zavalani, (Tiranë), Sofia Hientzaris (Athinë-Greqi), Edmond Shallvari (Selanik-Greqi), Sabit Idrizi (Mitrovicë-Kosovë), Roland Musta (Detroit-SHBA), Hysen Berisha (Kosovë-Norvegji), Ruzhdi Gole (Durrës), Namik Selmani (Berat), Jorgo Sofokli Telo (Gjirokastër), etj. si dhe disa talenteve të reja iu dha karta “Pranvera Letrare” e Klubit Drita. Disa Anëtarëve kartat iu dërguan në vendet ku jetonin.

Në këto veprimtari morën pjesë shkrimtarë dhe intelektualë të qytetit të Vlorës, bashkëfamiljarë të Fituesve të Çmimeve, si dhe të ftuar. Veprimtaritë u ndoqën nga Televizionet lokale të Vlorës dhe “Apollon” i qytetit të Fierit.

Takim me Shkrimtarë

Gjatë qëndrimit në Shqipëri, zhvilluam takime me shkrimtarët Miradie Ramiqi-Kosovë, Koço Kosta, Pandeli Koci, Pirro Loli, Kozeta Zavalani, Arben Kondi, Tiranë, Në Vlorë me poetin dhe studiuesin Primo Shllaku, i ardhur nga Tirana, Luan Toto, Pëllumb Velo, Petraq Pali, Luan Çipi, Vangjel Pici-Vlorë, poetet e reja: Lisiana F. Demiraj dhe Ariana Loçe-Tiranë, anëtaret më të reja të Klubit Drita, etj. Në Sarandë me poetin Dashamir Malo. Në Himarë me shkrimtarin Dr. Evriviadhi Goro, që sapo kishte nxjerrë librin më të ri “Kohë dhe njerëz” etj.

.

Nga veprimtaritë e Klubit “Drita” në Shqipëri Nëntor-2009

Nga veprimtaritë e Klubit “Drita” në Shqipëri
Nëntor-2009

Klubi i Shkrimtarëve në Botë “Drita” gjatë muajit Nëntor zhvilloi disa veprimtari letrare.

1. “Biblioteka “Drita” në Ministrinë e Punëve të Jashtme të Shqipërisë.
(25 nëntor 2009)
Sipas programit të përbashkët midis Klubit të Shkrimtarëve “Drita” dhe Drejtorisë së Institutit Kombëtar të Diasporës, në selinë e Ministrisë së Punëve të Jashtme, u organizua çelja e Bibliotekës “Drita”.

75 autorë me 300 tituj librash: nga fondi i Klubit “Drita”, si dhe nga autorë të gjendur në Greqi, Itali, Francë, Zvicër, Angli, SHBA, Kanada, Australi, Mal të Zi, Kosovë, Maqedoni, etj. Veç anëtarëve të Klubit “Drita” në Shqipëri, një ndihmesë të veçantë dha Klubi i shkrimtarëve “Petro Marko” në Vlorë, me kryetar z. Myrteza Mara, njëherësh dhe anëtar i kryesisë të Klubit “Drita”. Në “Bibliotekën Drita” që u çel në Ministrinë e jashtme kishte edhe libra të miqve tanë shkrimtarë, personalitete të letrave shqipe.

Në veprimtari, veç “të zotëve të shtëpisë”, morën pjesë diplomatë të ardhur edhe nga vendet fqinje, shkrimtarë e artistë, si dhe gazetarë të shtypit e medias televizive.




Pas përshëndetjes nga z. Sokol Dervishaj, i cili solli dhe përshëndetjen e kreut të dikasterit, z. Ilir Meta, Drejtori i Institutit Kombëtar të Diasporës, z. Flamur Gashi, midis të tjerash tha:
“Asnjëherë nuk është e mjaftueshme ndihma jonë për këto vlera që po jepni ju kulturës dhe kombit shqiptar. Prandaj ju falënderoj dhe ju uroj që sa më gjatë të vazhdojë kjo puna e juaj kaq e vyer! Ne jemi në prag festash, jo vetëm ato të këtij fundviti, por jemi në prag edhe të 100 vjetorit të Festës së Pavarësisë së Shqipërisë. Kjo festë kaq e madhe për kombin tonë do të përkojë edhe me organizimin e shumë veprimtarive kulturore e artistike në botë. Dhe, pa dyshim, Klubi i Shkrimtarëve Shqiptarë në Botë “Drita” do të jetë në qendër të këtyre veprimtarive që do të organizohen. Se kush më mirë se poetët, shkrimtarët, gazetarët, artistët mund ta përçojnë vlerën e madhe të Pavarësisë së Shqipërisë! Instituti Kombëtar i Diasporës do të bëjë të pamundurën që t’ju qëndrojë sa më afër, jo vetëm me praninë tonë, por edhe me mundësitë që do na krijojë qeveria shqiptare. Edhe një herë iu falënderoj të gjithëve dhe veçanërisht ata që kanë marrë mundimin të vijnë nga jashtë, këtu në Ministrinë e Punëve të Jashtme. Ju themi se zyrat, sallat, mjediset, ambasadat dhe çdo gjë që i përket Ministrisë së Punëve të Jashtme të Shqipërisë, janë të hapura për shkrimtarët, artistët, krijuesit dhe të gjithë ata njerëz që përçojnë vlerat kombëtare shqiptare, qoftë brenda komunitetit, qoftë tek miqtë tanë të huaj.




Ju faleminderit zoti Nase! Ju faleminderit për këtë kontribut të vyer që po bëni për Bibliotekën e Ministrisë së Punëve të Jashtme, për Bibliotekën e Institutit Kombëtar të Diasporës, por mbi të gjitha për vlerat tona kombëtare shqiptare! “

Kryetari i Klubit “Drita”, z. Nase Jani foli për veprimtarinë e shkrimtarëve në emigracion, të organizuar në Klubin “Drita” dhe për revistën letrare-artistike “Pelegrin”, organin e këtij klubi, duke përmendur emër më emër gjithë bashkëpunëtorët si dhe për ndihmesën që i jep Ambasada Shqiptare në Athinë, veprimtarisë letrare të këtij Klubi. Pastaj vetë autorët dhuruan disa nga librat e tyre për pjesëmarrësit.


2. Intervistë në TV. News 24 (15 minuta)
Në intervistë mori pjesë Kryetari i Klubit “Drita”, shkrimtari Nase Jani dhe Borina Voko, një nga anëtaret më të reja të këtij Klubi. U fol kryesisht për 5-vjetorin e revistës “Pelegrin” dhe ndihmesa që jep Klubi “Drita” për talentet e reja.




3. Intervistë në TV. Ora News (50 minuta)
Kryetari i Klubit “Drita” foli për jetën letrare të Klubit, 5-vjetorin e Revistës “Pelegrin”, kontributi i shkrimtarëve të diasporës në letërsinë shqipe, ruajtja e pastërtisë së Gjuhës Shqipe dhe përgatitjet që po bëhen për 10-vjetorin e Klubit “Drita” (27 maj 2010).



4. Në Vlorë, Anëtarja e 128 e Klubit “Drita”
Shoqata e Shkrimtarëve “Petro Marko” Vlorë, organizoi mbrëmjen letrare për librin më të ri “Stinë e çmendur” të poetes Albana Lulaj, e cila jeton në Itali. Kryetari i Klubit “Drita”, z. Nase Jani, i dha poetes së re Kartën e Anëtares së këtij Klubi, me Nr. 128.







5. Takim me shkrimtarë në Tiranë, Vlorë, Fier, Gjirokastër e Sarandë.
Kryetari i Klubit Drita” Nase Jani u takua me shkrimtarët dhe poetët Pandeli Koçi, Lindita Agolli, Rudina Xhunga, Fatime Kulli, Vitore Sallaku, Miradie Maliqi (Zvicër), Kujtim Boriçi, Muharrem Dardha, Riza Lahi, Ylli Molla, Petro Dudi, Petraq Kote, Myrteza Mara, Gëzim Llojdia, Çlirim Hoxha, Laureta Petroshati, Bardhosh Xhelaj, Bujar Muça, Dashamir Malo, Kostandin Vogli, Engjëllush Serjani, Ilir Lluri etj. ku diskutuan për veprimtarinë e Klubit në kuadrin e 10-vjetorit të krijimit dhe veçanërisht për “Drita Enciklopedi” dhe Antologjia e poetëve Ushtarakë.

Zëdhënësi i Klubit “Drita”: Aleko Likaj
30 nëntor 2009